…beit eldsnöggt í eina með öllu

Guðspjallið lesið og síðan hundrað orða hugleiðingin

Jesús sagði við hann: „Maður nokkur gerði mikla kvöldmáltíð og bauð mörgum. Er stundin kom að veislan skyldi vera sendi hann þjón sinn að segja þeim er boðnir voru: Komið, nú er allt tilbúið. En þeir tóku allir að afsaka sig einum munni. Hinn fyrsti sagði við hann: Ég hef keypt akur og verð að fara og líta á hann. Ég bið þig, haf mig afsakaðan. Annar sagði: Ég hef keypt fimm tvenndir akneyta og er á förum að reyna þau. Ég bið þig, haf mig afsakaðan. Og enn annar sagði: Konu hef ég eignast, ekki get ég komið.
Þjónninn kom og tjáði herra sínum þetta. Þá reiddist húsbóndinn og sagði við þjón sinn: Far þú fljótt út á stræti og götur borgarinnar og leið inn hingað fátæka, örkumla, blinda og halta. Og þjónninn sagði: Herra, það er gert sem þú bauðst og enn er rúm. Þá sagði húsbóndinn við þjóninn: Far þú út um stíga og vegi og þrýstu á menn að koma inn svo að hús mitt fyllist. Því ég segi ykkur að enginn þeirra sem fyrst voru boðnir mun smakka kvöldmáltíð mína.“

Lúkasarguðspjall 14.16-24

Ungi presturinn framtakssami var ósáttur við guðspjall dagsins. Fannst það ósannsanngjarnt í garð þeirra sem sinntu því sem honum fannst vera skylda. Skyndilegt matarboð á veitingastaðinn „Himnesk jörð“ kom á versta tíma því hann hugðist skoða nýkeypta sumarbústaðalóð. Sama átti við um fjölmiðlakonuna sem var nýbúin að kaupa flottustu reiðitygin. Og þau öll handgerð af frægri listakonu. Svo fannst honum það ekki laust við andfemínisma að tengja nýlegt parasamband við einhverjar annir og hugsaði feðraveldinu þegjandi þörfina. Prestinum unga fannst umsnúningur gestalistans vera slaufun og virðingarleysi. Hann beit snöggt í eina með öllu og ákvað að skella í eina gæludýramessu.