Gullið tækifæri gefst

Guðspjallið lesið og síðan hundrað orða hugleiðingin

Jesús kom til Jeríkó og gekk gegnum borgina. En þar var maður er Sakkeus hét. Hann var yfirtollheimtumaður og auðugur. Langaði hann að sjá hver Jesús væri en tókst það ekki fyrir mannfjöldanum því að hann var lítill vexti. Hann hljóp þá á undan og klifraði upp í mórberjatré til að sjá Jesú, en leið hans lá þar hjá. Og er Jesús kom þar að leit hann upp og sagði við hann: „Sakkeus, flýt þér ofan, í dag ber mér að vera í húsi þínu.“ Hann flýtti sér ofan og tók á móti honum glaður. Þeir er sáu þetta létu allir illa við og sögðu: „Hann þiggur boð hjá bersyndugum manni.“ En Sakkeus sneri sér til Drottins og sagði við hann: „Drottinn, helming eigna minna gef ég fátækum og hafi ég haft nokkuð af nokkrum gef ég honum ferfalt aftur.“ Jesús sagði þá við hann: „Í dag hefur hjálpræði hlotnast húsi þessu enda ert þú líka niðji Abrahams. Því að Mannssonurinn er kominn að leita að hinu týnda og frelsa það.“

Lúkasarguðspjall 19.1-10

Við ósköp lágvaxin og falin í litríkum mannfjölda þegar meistarinn frá Nasaret fer hjá og kallar í okkur. Hann sér okkur týnd í gjörningaveðrinu sem skekur dásemd og þunga líðandi stundar sem á okkur oftast. Og við yndislega lágvaxin prílum upp flughál mannlífsþrepin til að sjá það sem allir hafa talað um í tvö þúsund ár. Þau siðavöndu og ættprúðu á fremsta bekk sveia þegar meistarinn segist ætla að koma í kaffi og vöfflu til okkar. Við játum óttalaus margt óhreint í pokahornum okkar og erum tilbúin að bæta fyrir hitt og þetta þegar gullið tækifæri gefst eins og núna.