…og réttir þér lífið eilífa

Guðspjallið lesið og síðan hundrað orða hugleiðingin.

Þá sagði Pétur: „Við yfirgáfum allt sem við áttum og fylgdum þér.“ Jesús sagði við þá: „Sannlega segi ég yður að enginn hefur yfirgefið heimili, konu, bræður, foreldra eða börn vegna Guðs ríkis án þess að hann fái margfalt aftur á þessum tíma og í hinum komandi heimi eilíft líf.“

Lúkasarguðspjall 18.28-30

Kannski má lesa úr þessum orðum þreytulegt andvarp. Uppgjafatónn sleginn í ljósi þess sem fórnað var. Þeir yfirgáfu allt. Nú var komið bakslag – afturkippur að þeim fannst. Var ekkert meira í stað alls sem varð eftir? Þeir voru hrifnæmir og meira en það – orð hans vógu þyngra en allar andlegar og heimsins gersemar. Þess vegna fylgdu þeir honum. Fundu bráðlifandi andardrátt lífsins í orðum hans. Eða lífið sjálft. Gætum við sett okkur í þeirra spor? Að yfirgefa allt – og fylgja honum? Hann kemur til þín með allt sem þú gafst og réttir þér lífið eilífa. Þú sérð það ekki alltaf.