…til nýja hversdagsins

Guðspjallið lesið og síðan hundrað orða hugleiðingin

Þá sté Jesús í bát og hélt yfir um og kom til borgar sinnar. Þar færa menn honum lama mann sem lá í rekkju. Þegar Jesús sá trú þeirra sagði hann við lama manninn: „Vertu hughraustur, barnið mitt, syndir þínar eru fyrirgefnar.“
Nokkrir fræðimenn hugsuðu þá með sjálfum sér: „Hann guðlastar!“
En Jesús þekkti hugsanir þeirra og sagði: „Hví hugsið þið illt í hjörtum ykkar? Hvort er auðveldara að segja: Syndir þínar eru fyrirgefnar, eða: Statt upp og gakk? En til þess að þið vitið að Mannssonurinn hefur vald á jörðu að fyrirgefa syndir þá segi ég þér,“ -; og nú talar hann við lama manninn: „Statt upp, tak rekkju þína og far heim til þín!“
Og hann stóð upp og fór heim til sín. En fólkið, sem horfði á þetta, varð óttaslegið og lofaði Guð sem gefið hafði mönnum slíkt vald.

Matteusarguðspjall 9.1-8

Þeir höfðu frétt af honum í nágrenninu. Skelltu mér á börur. Trúðu heitt að meistarinn myndi hjálpa. Ég hristist allur á börunum. Göturykið þyrlaðist upp, hálfkæfði mig. Þarna stóð meistarinn í heitri sólinni og ég sá strax ljómann í andliti hans. En það voru líka skuggaandlit í kringum hann. Hann horfði á vini mína, leit svo í augum á mér, sagði barnið mitt! Ég komst við og varð hugsað til móður minnar. Augu hans sáu illar hugsanir dökkeygðu sérfræðinganna og hann sagði: „Ég hef vald til að…“ Og ég stóð upp, fór heim. Risinn upp til lífsins, til nýja hversdagsins.