Laugardagur fyrir páska

það vantar skotfæri
sagði rám rödd með dulinni ánægju
enda átti hún hlutabréf
í vopnaverksmiðju
smiðju dauðans

við brugðust fljótt við af gömlum vana
beinaberar hendur töldu silfurpeninga
þrjú hundruð milljónir fuku úr ríkissjóði

ég horfi á tvo litla krossa í glugganum heima hjá mér

elsku vinir!
það þarf nefnilega að drepa fólk
í nafni frelsis og ástar á lýðræðinu
við hin herlausa og friðelskandi þjóð
verðum að bera höfuðið hátt
vera eins og hin
og faðma stórmennin
blóðug fötin sendið þið svo bara í hreinsun
fyrir næstu kosningar

við sem lögðum þessar milljónir í ríkissjóðinn
vorum reyndar ekki spurð
sennilega vegna þess að við erum fífl
elskuverð fífl á kjördegi

þegar ég horfi á tvo litla krossa í glugganum heima hjá mér
man ég að barnahermenn gerðu þá úr skothylkjum

og byssukúlurnar okkar
fleygja frá sér gullnum skothylkjahamnum
á leið sinni í hjörtu hermannanna
sonanna, feðranna, mæðranna, dætranna
menningarinnar

barnabörnin mín brosa á móti páskasólinni
upprisunni og kærleikanum

og ég hugsa hvort þeim verði færð
ógrynni af blóðugum skothylkjum
sem eitt sinn hýstu banvænar byssukúlur
en hvíla nú á vígvellinum sem þögul vitni

að manndrápum

ég heyrði vindinn hvísla
að frelsarinn hefði stigið niður til heljar
laugardaginn fyrir páska
og þar hefði ekki skort byssukúlur
heldur aðeins kærleika