Trú og víðsýni

Það hefur löngum þótt góður kostur að vera víðsýnn. Engum blandast hugur um að það sé merki um þroskaðan huga og agaðan að geta séð öll málefni út frá sem flestum sjónarhornum.

Víðsýnn hugur er opinn hugur og fordómalaus gagnvart því sem fyrir augu og eyru ber. Í víðsýni er falið ákveðið umburðarlyndi sem kemur í veg fyrir gáleysislegar fullyrðingar og dómhörku. Víðsýni er þó ekki þrúgandi skoðanaleysi þar sem yppt er öxlum yfir öllu því sem menn sjá, lesa og heyra. Víðsýnn maður hefur skoðanir en hann þröngvar þeim aldrei upp á aðra enda ber hann virðingu fyrir skoðunum annarra og tekur þær jafngildar sínum. Víðsýnn maður þegir ekki heldur því að hann veit að þögn getur stundum verið hættuleg og fleytt lyginni áfram.

Það er ríkur þáttur í fari víðsýns manns að hlusta á skoðanir annarra, ræða mál og skoða í sem víðustu samhengi. Í daglegum samskiptum við annað fólk kemur víðsýni sér vel og getur verið sem leiðarljós í samtölum og kynnum. Víðsýni lærist nefnilega ekki eingöngu í uppeldi, lestri og áhorfi. Annað fólk og hagur þess getur einnig aukið víðsýni okkar.

Mannlífið er fjölbreytilegt og litskrúðugt. Mennirnir temja sér ólíka siði og venjur, sem eiga sér flestir djúpar rætur í uppeldi og menningu. Hvort tveggja mótar hugarfar, skoðanir og siði, og getur verið með ýmsum hætti. Þessi fjölbreytilega flóra sem mannkynið  sýnir hvetur okkur til að virða aðra menn hvar sem þeir kunna að búa, bera virðingu fyrir skoðunum þeirra og siðum. Hafa lífsbætandi og jákvæð áhrif á þau sem kunna að vera höll undir lífsfjandsemi við einstaklinga og þjóðir.

Kristin trú horfir í nútímanum yfir svið mannlífsins og sterkur þáttur í sýn hennar er víðsýni. Jákvæð afstaða til manns og heims er einn af hornsteinum kristinnar trúar. Kristinn maður stendur lífsins megin vegna þess að trú hans er reist á lífi Guðs í heimi. Allt er frá honum komið og allt stefnir til hans.

Fjölbreytni lífsins í heimi Guðs kennir okkur víðsýni og varpar ljósi á okkar eigið líf. Sá maður sem gengur undir merki kristinnar trúar í hversdagslegu lífi sínu veit að öll sköpunin er merkt elsku Guðs. Guð ávarpar manninn og heiminn í Jesú Kristi; tekur hann að sér í umhyggju og leiðbeinir honum á vegi lífsins; hvetur til að taka í hönd meðbræðra- og systra sem eru hjálparþurfi.

Kristin trú rekur á brott alla fordóma frá öllum mönnum því að allir eru þeir börn Guðs og ekkert fær þá skilið frá kærleika hans.

Þetta er fordæmi fyrir okkur mennina um víðsýni. Við höfum tilhneigingu til að flokka menn, hólfa mannlífið, setja aðra menn til hliðar, vegna þess að þeir falla ekki að hugmyndum okkar um hvernig menn eigi að hugsa, vera og líta út. Víðsýni afhjúpar allan slíkan hégóma og áráttu  mannsins til að skipa fólki niður í sæti eftir pelli og purpura.

Kristinn maður horfir fullur eftirvæntingar til lífsins. Hann veit um óþrjótandi elskubrunn Guðs í líðandi andránni og skapandi neista upprisunnar.

Kristinn maður er raunsær í hugsun sinni um sjálfan sig og heiminn. Hann veit mæta vel hve hugsun hans getur orðið gagntekin af honum sjálfum, hvað hún getur steypst í einu vetfangi ofan í gjá sjálfselsku og þröngsýni. Þegar slíkt gerist er gott að rifja upp sögu Jesú Krists sem gekk um kring og gerði gott. Hann fór ekki í manngreinarálit heldur umfaðmaði með orðum og elskufylltum huga hvern þann sem varð á vegi hans. Þannig verður kristin trú okkar besti leiðbeinandi í víðsýni og hjálpsemi við annað fólk.

Trúin sýnir okkur hve dýrmæt gjöf lífið er og hve það er mikilvægt að fara vel með þessa gjöf svo að allir njóti hennar.

Já, kristinn maður er víðsýnn og raunsær. Hann tekur í útrétta hönd skaparans sem kallað hefur til lífs þennan heim sem er svo ótrúlega fjölbreyttur að orð fá ekki lýst nema broti af honum. Þar er allt á sínum stað. Og í þessum heimi erum við, mennirnir, sem höfum fengið þá einstöku gjöf að njóta fjölbreytileika lífsins þegar við opnum augu okkar og gefum víðsýni trúarinnar færi.