Þykkvabæjarkirkja – Hábæjarkirkja

Þykkvabæjarkirkja er í Oddaprestakalli, Suðurprófastsdæmi.

Talið er að kirkja hafi verið í Þykkvabænum nokkru eftir kristnitöku.

Nafn kirkjunnar var áður Hábæjarkirkja en því var breytt 1997. Helst munu það vera brottfluttir sem kalla hana Hábæjarkirkju.

Kirkjan var vígð 8. október 1972 af sr. Sigurbirni Einarssyni (1911–2008) biskupi. Nýja kirkjan kom í stað kirkju sem reist hafði verið í Hábæ 1914 og var sú fyrsta þar. Áður hafði kirkjustaðurinn verið að Háfi í Þykkvabæ en kirkjan þar var lögð niður 1914 og ný reist fyrir sóknina í Hábæ sama ár. Gamla kirkjan var teiknuð af Rögnvaldi Ágústi Ólafssyni (1874–1917) og var fyrsta steinsteypta kirkjan á Suðurlandi. Kirkjan var brotin niður upp úr 1970 en hún stóð innan kirkjugarðs við austurhlið nýju kirkjunnar.

Ragnar Emilsson (1923–1990) arkitekt teiknaði kirkjuna. Hún er um 200 m² og tekur 180 manns í sæti. Hafist var handa við byggingu kirkjunnar 1967 og unnu heimamenn að því verki.

Kirkjan er prýdd sjö steindum gluggum sem Benedikt Gunnarsson (1929–2018) listmálari gerði og komu þeir í kirkjuna 1982. Stærð allra glugganna er 83,5×83,5 cm. Benedikt var einn fremsti kirkjulistamaður landsins.

Altarisdúkur var gefinn árið 2006 af Kvenfélaginu Sigurvon og var gerður af Ainu Björk Dam (f. 1938).

Sigurður Vigfússon (1828–1892) gullsmiður og fornfræðingur gerði kaleik og patínu sem eru í eigu kirkjunnar.

Á altari eru tveir blómaleirvasar gerðir af Magnúsi Pálssyni (f. 1929) myndlistarmanni.

Til hliðar á kórvegg bak við prédikunarstól er olíumálverk eftir listmálarann Kristin Morthens (1917–2002) sem sýnir Jesú á bæn í Getsemanegarðinum.

Skírnarfonturinn er skreyttur af listakonunni Gretu Björnsson (1908–1985) og er frá árinu 1953.

Kirkjuklukkur eru tvær, önnur frá árinu 1787 og hin líklega eldri. Þær voru báðar í Háfskirkju áður.

Horft inn kirkju

Skírnarfontur skreyttur af Gretu Björnsson

Líkan af gömlu kirkjunni frá 1914 og gluggi Benedikts, hvítasunnan

Prédikunarstóllinn og bak honum mynd Kristins Morthens, Jesús í Getsemanegarðinum

Guðbrandsbiblíu sómi sýndur og sálmatafla úr gömlu kirkjunni

Jesús í Getsemanegarðinum eftir Kristin Morthens

Horft til altaris og yfir bekki

Horft frá altari og fram kirkju                                                                                                                                                                                                                                                                                                                                                             Steindir gluggar Benedikts Gunnarssonar                                                

Gluggi nr. 1: Verði ljós og það varð ljós

Gluggi nr. 2: Meðan jörðin stendur skal ekki linna sáning og uppskeru…

Gluggi nr. 3: Vér sáum stjörnu hans…

Gluggi nr. 4: Krossinn, tákn kristindómsins

Gluggi nr. 5: Þyrnikórónan, tákn þjáningar Krists

Gluggi nr. 6: Kaleikurinn og brauðið

Gluggi nr. 7: Hvítasunnan, stofndagur kristins safnaðar

Þykkvabæjarkirkja (Hábæjarkirkja) er nútíma kirkja

Nafn kirkjunnar, Þykkvabæjarkirkja, áréttað með skilti og mynd af gömlu kirkjunni, Hábæjarkirkju frá 1914