Hversdagslegur sálarháski

Guðspjallið lesið og síðan hundrað orða hugleiðingin

Nú fór Jesús í bátinn og lærisveinar hans fylgdu honum. Þá gerði svo mikið veður á vatninu að bylgjurnar gengu yfir bátinn. En Jesús svaf. Þeir fara til, vekja hann og segja: „Drottinn, bjarga okkur, við förumst.“ Hann sagði við þá: „Hví eruð þið hræddir, þið trúlitlir?“ Síðan reis hann upp, hastaði á vindinn og vatnið og varð stillilogn. Mennirnir undruðust og sögðu: „Hvílíkur maður er þetta? Jafnvel vindar og vatn hlýða honum.“

Matteusarguðspjall 8.23-27

Hún hafði oft virt þetta listaverk fyrir sér og dáðst að krafti sjómannsins sem hélt í hönd hins drukknandi manns sem svall af lífsvilja. Líkaminn var tryllingslega sveigður og höfuðið teygt upp til himins. Eða festi hann vonaraugu sín á kröftugan bjargvættinn sem horfði biðjandi augum í himindjúpið? Þetta voru sterkir menn og hrammur grængolandi regindjúpsins náði ekki að svelgja þá í sig. Lífsviljinn og einbeitt bjargarvon faðmast saman svo lífið komist í höfn. Hún laut höfði við listaverkið sem huggaði hana og bað til meistarans frá Nasaret að hann bjargaði henni því hversdagslegur sálarháski var ekki langt frá henni.