Leyndarmálið

Guðspjallið lesið og síðan hundrað orða hugleiðingin

Sannlega, sannlega segi ég yður: Sá sem trúir á mig mun einnig gera þau verk sem ég geri. Og hann mun gera meiri verk en þau því ég fer til föðurins. Og hvers sem þér biðjið í mínu nafni það mun ég gera svo að faðirinn vegsamist í syninum. Ef þér biðjið mig einhvers í mínu nafni mun ég gera það.

Jóhannesarguðspjall 14.12-14

Hann hugsaði með sér hvort þetta væri hræsni. Örugglega segði einhver það vera sjálfselsku. Hvað átti hann að gera þegar hann heyrði sagt að barnið hans ætti eftir þrjá mánuði ólifaða? Aðeins kraftaverk gæti bjargað því sagði læknirinn. Og hann sem fyrirleit trú og níddi niður kirkjuna hvenær sem tækifæri gafst. Hafði safnað undirskriftum gegn henni. Nú fór hann hikandi með bæn í huganum. Ráðvilltur og skjálfandi. Orðin sem hann hafði valið sér sem kjörorð í fermingunni mundi hann núna svo vel: „Ef þér biðjið mig einhvers í mínu nafni mun ég gera það.“ Þetta yrði leyndarmálið hans um eilífð.