…lífið er hér og handan þess

Guðspjallið lesið og síðan hundrað orða hugleiðingin

„Hjarta yðar skelfist ekki. Trúið á Guð og trúið á mig. Í húsi föður míns eru margar vistarverur. Væri ekki svo hefði ég þá sagt yður að ég færi burt að búa yður stað? Þegar ég er farinn burt og hef búið yður stað kem ég aftur og tek yður til mín svo að þér séuð einnig þar sem ég er. Veginn þangað sem ég fer þekkið þér.“
Tómas segir við hann: „Drottinn, við vitum ekki hvert þú ferð, hvernig getum við þá þekkt veginn?“
Jesús segir við hann: „Ég er vegurinn, sannleikurinn og lífið. Enginn kemur til föðurins nema fyrir mig. Ef þér hafið þekkt mig munuð þér og þekkja föður minn. Héðan af þekkið þér hann og hafið séð hann.“
Filippus segir við hann: „Drottinn, sýn þú okkur föðurinn. Það nægir okkur.“
Jesús svaraði: „Ég hef verið með yður allan þennan tíma og þú þekkir mig ekki, Filippus? Sá sem hefur séð mig hefur séð föðurinn. Hvernig segir þú þá: Sýn þú oss föðurinn? Trúir þú ekki að ég er í föðurnum og faðirinn í mér? Það sem ég segi við yður eru ekki mín orð. Faðirinn, sem í mér er, vinnur sín verk. Trúið mér að ég er í föðurnum og faðirinn í mér. Ef þér trúið ekki orðum mínum trúið þá vegna sjálfra verkanna.

Jóhannesarguðspjall 14.1-11

Vegurinn sem meistarinn talar um, hann er ekki að finna á google-map. Og sannleikurinn íklæðist allskonar búningum í samfélaginu og býður upp í dans við lífið á mörgum stöðum. En meistarinn frá Nasaret er vegurinn, sannleikurinn og lífið. Vegur sem leiðir til lífs og eilífðar, sannleikur sem segir hver maðurinn er og lífið er hér og handan þess. Meistarinn vill að við séum þar sem hann er. Það er enginn húsnæðisskortur á himnum og við þurfum ekkert að óttast. Það er trúin sem er hornsteinn alls. Guð hefur axlað byrðar holdsins og öllu sem því fylgir í meistaranum frá Nasaret.